ملاحظات عامه فى ميكانيكا :-
1- اختار التصميم على حسب الامكانيات اللى فى المعمل .
2- الترتيب الصح وحسن اختيار التصميم من حيث الميكانزمات والابعاد
2- عند الرسم والتخطيط افضل الرسم بمقياس رسم علشان يدينا تخيل للابعاد الحقيقية للروبوت فى النهايه.
3- عند وضع التصميم وبدايه العمل نخلى فى بالنا دايما احتماليه فك الاجزاء ديه من تانى يعنى مش المهم انها تركب وخلاص (فى الاجهزة بيسموها احتمالية الصيانه) .
4- لاحظ مكان مركز الجاذبيه للروبوت والافضل ان يكون منخفض فى الوضع الراسى وفى المنتصف فى الوضع الافقى .
5- حاول تجرب الافكار اللى على الورق بنماذج صغيرة من الخشب او الكرتون مثلا.
6- عمل رسم ثلاثى الابعاد ببرنامج كمبيوتر اذا امكن ده حيبين مشاكل الميكانزم وبكده نقدر نتفاداها قبل التنفيذ.
7- نحاول نحتفظ بكل ورقه فيها رسم يخص التصميم وكل الافكار الى اتناقشت فى دوسيه نسيبه فى المعمل ده حيفيد المجموعه اذا حبت ترجع لتصميم قديم نقشوه قبل كده , وكمان حينفع الناس اللى حتيجى بعد كده وعايزه تشوف افكار قديمه وازاى الناس اللى قبلها فكرت من الاول علشان توصل لشكل الروبوت النهائى والدوسيه ده يكتب عليه اسم المجموعة ورقم الروبوت واذا كان الروبوت ده فاز بمركز والسنه طبعا ؛ حتى لو الروبوت مش شغال او مفيهوش موتير بس علشان افكار ميكانيكا اللى فيه لانه بسهل شرح الميكانزمات على روبوتات موجوده قدام الناس.
8 - تابع الوزن اول باول (والافضل حساب الوزن مبدئيا بعد اختيار التصميم) لازم على قد منقدر نخلى كل جزء بنختاره من البدايه يكون خفيف فى الوزن لانه ده افضل من اننا نختار اجزاء وخلاص و نلاقى نفسنا فى النهاية قدام مشكلة كبيرة اسمها - الوزن تقيل – ونبدا نفك الروبوت كله بسببها ونخسر وقت وجهد كبير .
9- توزيع الشغل على حسب وقت كل شخصين مع بعض لانه غالبا فى شغل ميكانيكا دايما بيحتاج لاكتر من يد للمساعده وكمان للتشاور فى الحاجات البسيطة اللى بتبقى داخل الميكانزم والفريق مش بيتفق عليها عند وضع الميكانزمات الاساسيه .
**المرجع الاول والاخير فى ميكانيكا هوه المعمل حاول كل وقت فراغ انك تكون فى المعمل بس ده طبعا بعد الدراسه وبترتيب المواعيد لانى الدراسة هى وظيفتنا الاولى فى الجامعة.
المواد المستخدمه :-
1. الامونيتال : - وهى الماده الاساسيه اللى بنعمل منها الروبوت كله تقريبا , فى اماكن فى اسيوط مختصه بيعها وبنشتريها حسب نوع المقطع بالطول اللى احنا عايزينه ,وممكن نقفل جزء منها فى المحل اثناء الشراء.
2. الخشب :- وهى مادة مساعده يعنى مثلا بنملا بيها قطع الامونيتال المفرغه لانه اذا حبينا نتقب فى الامونيتال المفرغ حيحصله تشوه وممكن مينفعش نستخدمه تانى.
3. البلاستيك :- احيانا بنستخدمه فى شكل مواسير مثلا وهى مواسير بتتباع فى اسيوط من كذا محل خاصين ببيع المواسير البلاستيك وتشترى بالبوصه والطول المطلوب , و لوضع الدوائر على الروبوت يتم تثبيتها فى شيتات من البلاستيك .
المساعدات :-
1. الزوايا :- وهى بتكون من الامونيتال وتكون قطعة واحدة طويلة ويتم تقسيمها على حسب الطول وفى النهايه تكون على شكل حرف L .
2. البكرات (pulley ) :- وهى انواع منها البلاستيك وهو كبير فى الحجم وينفع للحبل السميك لكن بيهتاج فى تثبيته مسمار كبير او ممكن نفكر فى طريقة لتثبيته بمسمار صغير بوضع ورده على البكره من النحيتين وبكده صغرنا فتحه البكرة ؛ والنوع التانى الحديد وهو مع الحبل المتوسط فى السمك و الصغير ولكن يخرج من التجويف ويمنع البكرة من التحرك بسهوله ولذلك المفروض يكون الحبل مشدود والنوع ده متعب اذا حبيت وضعه بطريقه معينه لاننا بنلجا لتقبه فى المنتصف وبحذر يتم وضع مسمار جديد مقلوظ لسهوله تثبيته فى الروبوت نفسه.واذا الطريقة ديه متعملتش بحذر ممكن تتفك البكرة ويخرج منها البكر الصغير الداخلى اللى بتتحرك عليه وكده مينفعش نستخدم البكرة تانى .